Францускиот гигант Пари Сен Жермен (ПСЖ) поднесе тужба против својот поранешен напаѓач Килијан Мбапе, барајќи 98 милиони евра поради, како што тврдат, „тактики на одложување“ што го оштетиле клубот. Случајот е кулминација на правниот конфликт што трае со месеци.
Поништување на заплена од 55 милиони евра
ПСЖ исто така поднел контратужба за поништување на заплената од 55 милиони евра, која Мбапе успеа да ја издејствува преку судска мерка во април, со аргумент дека клубот му должи бонуси и компензации.
Адвокатите на клубот тврдат дека нема доволни докази дека ПСЖ му должи пари, ниту дека постои реална закана од неплаќање.
Адвокатите на Мбапе: „Каде се парите?“
Адвокатот на Мбапе, Томас Клеј, тврди дека клубот досега вратил само 14 од 55 милиони евра, и дека преостанатите средства сè уште треба да бидат исплатени.
„Не беше лесно да се наметне залог – банките одбија. Ова е клуб што е финансиран од држава. Кога има недостаток на транспарентност, постои реален ризик“, рече Клеј.
ПСЖ: „Мбапе го доби сè, па се обиде да избега“
Од ПСЖ, пак, тврдат дека Мбапе нанел директна штета со своето однесување.
„Тој го доби сето она што го побара, па потоа се обиде да избега со него, мислејќи дека никој нема да забележи. Но, клубот има право да се брани“, рече адвокатот на ПСЖ, Рено Семерџијан.
Очекувања за судската одлука
Судот треба да се изјасни на 26 мај, кога ќе стане јасно дали Мбапе ќе ги добие своите пари или ПСЖ ќе успее да ја задржи правната контрола и да докаже штета.
Правната битка го вклучува и прашањето за транспарентноста на финансиите во ПСЖ, особено имајќи го предвид финансирањето од државата Катар.
