Посета на пациентите во Белград
Претседателот на Србија, Александар Вучиќ, денеска ги посети повредените од страшниот пожар во дискотеката во Кочани, кои се на лекување во Универзитетскиот клинички центар на Србија. Вучиќ нагласи дека Србија ќе прими вкупно 29 повредени лица и истакна дека болничките капацитети во земјата нудат врвни услови за лекување.
„Невозможно е да се најдат подобри болнички услуги во Европа. Никаде нема интензивна нега со подобри услови од овие во Белград. Имав можност да ги посетам луѓето кои беа повредени во страшната трагедија во Кочани, Северна Македонија. Девет од нив лежат овде во Клиничкиот центар. Прво посетив двајца, а потоа заедно посетивме уште седум. Последното лице што го посетивме за жал е во животна опасност, а другите не се. Степенот на изгореници кај пациентите се движи од четири проценти“, изјави Вучиќ.
Проблеми со респираторниот систем
Претседателот на Србија објасни дека кај неколку пациенти најголем проблем се повредите на респираторниот систем, што дополнително ја комплицира нивната здравствена состојба.
„Кај нас ќе дојдат уште 12 пациенти. Ги имаме на ВМА, ги имаме во нашиот Клинички центар во Ниш. Како што стојат работите во моментов, вкупно 29 пациенти ќе бидат згрижени во Србија“, додаде Вучиќ.
Поддршка за македонскиот народ
Тој порача дека Србија секогаш ќе стои покрај македонскиот народ во најтешките моменти и ќе продолжи да помага на сите можни начини.
„Србија ќе направи сè што е во нејзина моќ за да ги спаси животите на повредените. Оваа трагедија ги погоди сите нас и ја чувствуваме како наша“, заклучи српскиот претседател.
