Со доаѓањето на потоплите денови и по невообичаено дождливиот период, во Скопје повторно се појавија змии, што предизвика загриженост кај граѓаните. Веќе има документирани случаи на присуство на змии во урбаните населби – жител од Карпош фотографирал змија на сопствена тераса.
Граѓаните алармираат дека неискосената трева и запуштените зелени површини претставуваат ризик, особено за децата и миленичињата. „Има трева до коленици, не знам зошто не е искосено. Опасно е, има и крлежи и змии“, изјави една жителка.
Најризични се парковите и тревниците покрај улиците
Најмногу вегетација има во парковите помеѓу зградите и покрај сообраќајниците, каде децата често играат. Родителите изразуваат страв, предупредувајќи дека змиите може лесно да се сокријат во тревата, а децата не се свесни за опасноста.
„Јас не стравувам, ама децата не знаат. Господ нека ни е на помош“, изјави друг граѓанин.
Експертите советуваат внимателност и избегнување на висока трева
Зоологот Стеријовски вели дека иако отровните змии ретко се појавуваат во централните делови на градовите, можноста не е исклучена – особено ако се донесат со возило од природата. Честопати се појавуваат водни змии, кои иако не се отровни, можат да исплашат луѓе.
„Граѓаните треба да избегнуваат висока трева, бидејќи таму е најтешко да се забележат змиите навреме“, вели тој.
Не се обидувајте сами да ги заловите змиите
Стеријовски апелира до граѓаните да не се обидуваат самостојно да ги фаќаат змиите, туку да повикаат професионалци. Тој додава дека потребно е создавање на посебен сектор за заловување на змии и за едукација на населението.
Во моментот, Град Скопје не се смета за надлежен за вакви случаи – тие се во ингеренција на општините, кои имаат предвидено средства за вакви интервенции.
Што да направите при каснување од змија?
Експертите препорачуваат да не се пие вода и да се остане во мирување. Движењето го забрзува отровот низ телото, а не треба ниту да се подврзува местото на каснување, бидејќи може да се предизвика прекин на крвотокот.
Во Македонија има 16 видови змии, од кои 5 се отровни – меѓу нив шарката, остроглавата шарка и поскокот, кој е со најсилен отров.
