Во Москва заврши воената парада по повод Денот на победата, која траеше нешто помалку од два часа. По првпат беа прикажани дроновите „Лансет“ и „Геран-2“, што беше од особен интерес за публиката и медиумите.
Според извештаите од западните медиуми, годинашнава парада беше значително поголема од претходните. На неа учествуваа околу 11.500 припадници на руските вооружени сили, за разлика од 7.000 до 8.000 во минатите години.
Лидери од 20 земји присутни на парадата, меѓу нив и Вучиќ и Си Џинпинг
На парадата присуствуваа светски лидери меѓу кои и српскиот претседател Александар Вучиќ и кинескиот претседател Си Џинпинг. Од Европската Унија присутен беше само словачкиот премиер Роберт Фицо. Рускиот претседател Владимир Путин одржа краток говор пред присутните, а прославата се одвиваше под строги безбедносни мерки.
Импресивна демонстрација на воена опрема и безбедносни мерки
Настанот започна со биење на камбаните на Спаскаја кулата, а на Црвениот плоштад беа внесени знамињата на Руската Федерација и Советскиот Сојуз. Командата на парадата ја водеше генерал Олег Саљуков, врховен командант на копнените сили на Русија.
Покрај претседателот Путин и странските гости, на трибините присуствуваа ветерани и почесни гости, многумина на возраст над 90 години. Во парадата учествуваа и воени академии, козачки единици, специјални сили, извидници, и повеќе од 130 единици на воена опрема и ракетни системи.
Путин наздрави за мир, Зеленски ја осуди парадата
Во текот на официјалната вечера со странските делегации, Путин наздрави за победата, мирот и просперитетот. Тој ја истакна важноста на 9 мај како симбол на заедништво и победа над фашизмот. Претходно, со Си Џинпинг потпишаа документ за глобална стратешка стабилност.
Украинскиот претседател Володимир Зеленски, пак, ја осуди парадата, нарекувајќи го секое странско присуство поддршка за рускиот агресор.
Путин и Вучиќ со нови средби, Москва преплавена со знамиња
Покрај учеството на парадата, Вучиќ имаше билатерални средби со претседателите на Русија и Кина. На Инстаграм сподели дека синоќа имал „братска средба“ со словачкиот премиер Фицо.
Целиот град Москва беше украсен со руски знамиња и пораки во чест на победата во 1945 година. Продажните објекти и ресторани беа исполнети со постери кои ја славеа историјата.
Иако Путин прогласи прекин на огнот од 8 до 10 мај, украинските власти пријавија прекршувања по целата фронтовска линија. Москва пак тврди дека реагирала само на украински напади.
