На денешното рочиште за случајот со убиството на Вања Ѓорчевска (14) и Панче Жежовски, Обвинителството објави нови докази, вклучувајќи информација дека обвинетиот Боре Видевски не бил на работа во деновите кога се случиле грабнувањата и убиствата (22 и 27 ноември).
Дополнително, Обвинителството соопшти дека нема достапни податоци за пробно испукување со пиштолот кој Видевски легално го поседувал, што оневозможува форензичка споредба со чаурата пронајдена кај рудникот во Велес.
Без совпаѓање во системот за компарација
Чаурата од калибар 9 мм, произведена во „Сувенир“ – Македонски Брод во 2002 година, е внесена во системот за автоматска балистичка анализа, но не е најдено совпаѓање со други случаи во земјата.
Како што истакна Обвинителката, без пробна чаура од пиштолот на Видевски, не може да се направи точна компаративна анализа со пронајдената чаура.
Палевски обвинува: „Ова е прикривање на слабата истрага“
Првообвинетиот Љупчо Палевски реагираше остро на новите докази, нарекувајќи ги „доцна објавени“ и „обид да се покрие лоша истрага“.
„Ова е класично покривање на непостапување во однос на оружјето“, рече тој пред судот.
Продолжува изведувањето докази – комуникација со сведоци
Судењето продолжи со презентирање на фото-документација од комуникација меѓу Љупчо Палевски и Ерол Османи, кој веќе сведочеше во случајот.
Обвинителен акт: Испланирано грабнување и убиство
Обвинението наведува дека Љупчо Палевски, Боре Видевски, Велибор Манев, Влатко Кешишов и Александар Ѓорчевски заедно испланирале грабнување на малолетната Вања за да изнудат пари од нејзиното семејство. Панче, според Обвинителството, бил грабнат за да се добие неговото возило, кое било користено при киднапирањето.
Двете жртви беа пронајдени мртви на 3 декември 2023 година, неколку дена по нивното исчезнување.
