Во текот на вчерашната вечер, во еден од угостителските објекти на Градскиот плоштад во Штип, беше убиен 25-годишен странски државјанин. Според информациите од Основното јавно обвинителство, жртвата со неколку прострелни рани била пренесена во Градската болница во Штип, каде и покрај напорите на лекарите за реанимација, им подлегнала на повредите.
Напаѓачот сѐ уште е во бегство
Инцидентот предизвика силна вознемиреност кај присутните, а надлежните органи веднаш започнаа истрага. Напаѓачот, исто така странски државјанин, е идентификуван и се трага по него. Сѐ уште не е познат мотивот зад нападот.
„Од местото беа подигнати се чаури и други траги кои ќе бидат предмет на вештачење, а телото на починатиот е дадено за обдукција. Обезбедени се и прегледани снимки од видео надзор“, соопштија од обвинителството.
Снимки од патарини можеби водат до осомничениот
На социјалните мрежи почнаа да кружат видеа за време на и по инцидентот. На една од снимките, која наводно е од патарината на автопатот Штип – Скопје, се гледа возило како ја пробива рампата, за кое се претпоставува дека може да биде поврзано со бегството на напаѓачот.
Истрагата е во тек, а надлежните апелираат до граѓаните кои имаат информации да ги пријават во најблиската полициска станица. Очекувањата се дека наскоро ќе има повеќе детали околу случајот, кој предизвика сериозен шок и загриженост во локалната заедница.
