Европската комисија во среда ќе објави контрамерки како одговор на најновите американски царини воведени од претседателот Доналд Трамп. Според најавите, царините на САД – 25 отсто за алуминиум и челик и дури 50 отсто за одредени производи – ќе стапат на сила на 15 април, што го натера Брисел итно да реагира.
„Ако не може со преговори, ќе мора со мерки“, порачуваат од ЕУ. Според дипломатски извори, се разгледува и воведување контрацарини за американските автомобили, технолошки производи и дигитални услуги, што може да ги засегне големи компании како Apple, Meta и Amazon.
Паника и консултации на високо ниво
Европските лидери, вклучително и британскиот премиер Кир Стармер и францускиот претседател Емануел Макрон, се согласија дека е неопходно да се преземат мерки за заштита на економските интереси на Европа. Стармер дури предложи и државна интервенција за заштита на британскиот бизнис, додека ЕК разгледува воведување дигитален данок за американските компании.
Берзите во пад, економијата под закана
Новата економска политика на Трамп предизвика драматичен пад на берзите и вознемиреност во глобалната економија. Според економистите, оваа трговска војна може да доведе до глобална рецесија.
Иако Трамп преку својата социјална мрежа „Truth Social“ порачува дека ова е „економска револуција“ и дека „крајниот резултат ќе биде историски“, многумина го предупредуваат дека овој потег би можел да биде фатален за глобалната стабилност.
Неочекувана реакција од Маск
Изненадувачки, дури и Илон Маск, долгогодишен поддржувач на Трамп, излезе со критика. Тој побара создавање зона на слободна трговија меѓу САД и ЕУ, повикувајќи на разум и дијалог. Маск веќе загуби милијарди поради новите царини, бидејќи Tesla зависи од компоненти увезени од Кина, кои сега се дополнително оданочени.
Конечен судир меѓу два света
Експертите на BBC предупредуваат дека со овие мерки САД ја враќаат светската трговија еден век наназад. Европа, од друга страна, се обидува да одржи стабилност и правичност, но ако нема договор – ќе следи жесток одговор.
Како што велат европските функционери: „Ова не е само економија. Ова е борба за принципите на фер трговија.“
