Берзанските индекси на Волстрит претрпеа најголем дводневен пад од пандемијата во 2020 година, откако претседателот Доналд Трамп објави драстични увозни царини. Според финансиските аналитичари, во рок од само 48 часа испариле над 5 трилиони долари пазарна вредност од водечките компании.
Индексот S&P 500 изгуби 10,5% за два дена, додека Dow Jones падна за 9,3%. Најголем удар претрпе технолошкиот Nasdaq, кој загуби 11,4%.
Страв од рецесија – 60% шанси според аналитичарите
Финансиските експерти предупредуваат дека новиот бран на царини може да има катастрофални последици за глобалната економија. Според последните проценки, постојат 60% шанси светската економија да влезе во рецесија до крајот на годината.
Царините воведени од САД веќе предизвикуваат потенцијални трговски војни со ЕУ, Кина и другите економски сили, што дополнително ја зголемува нестабилноста на пазарите.
Историски падови, неизвесна иднина
Според пазарните аналитичари, ова е најголем пад на индексите за два дена во последните четири години. Последен пат кога се забележал сличен пад беше во март 2020 година, кога светот влезе во пандемиски локдауни.
Иако некои инвеститори очекуваат привремено стабилизирање, несигурноста околу надворешната трговска политика на САД продолжува да влијае на расположението на пазарите. Голем број компании веќе предупредија за можни кратења на трошоци, отпуштања и ревидирање на деловните прогнози.
