Ужасен случај на семејно насилство ја згрози македонската јавност
Откриен монструозен случај на трговија со луѓе
Македонската јавност е шокирана од случајот на семејно насилство и трговија со луѓе што го откри полицијата. Главниот осомничен, кој бил во брак со жртвата девет години, систематски ја малтретирал, физички и психички, а потоа ја принудувал на проституција во замена за пари и дрога.
Истражителите од Националната единица за борба против криумчарење мигранти и трговија со луѓе, заедно со Јавното обвинителство за организиран криминал, открија дека жртвата била изложена на континуирано насилство и понижување. Мажот ја контролирал, ја тепал, ја горел со цигари и ѝ се заканувал со смрт.
Истрагата открива грозоморни детали
Случајот бил инициран во ноември 2023 година, кога обвинителството во Тетово поднело обвинение за семејно насилство. Подоцна истрагата утврдила дека станува збор за организирана трговија со луѓе, поради што предметот бил предаден на надлежните институции.
Полицијата идентификувала шестмина осомничени, меѓу кои и клиенти кои плаќале за сексуални услуги. Првоосомничениот ја принудувал својата сопруга да пружа сексуални услуги во угостителски објекти во Тетово и Гостивар, како и во приватни домови на клиентите. За време на средбите, тој ја следел преку видео повици за да осигура дека ќе му ги предаде парите или дрогата.
Судот определи притвор за четворица осомничени
Обвинителството побарало мерка притвор за четворица од осомничените, додека двајца веќе се наоѓаат зад решетки. Судот го прифати барањето и определи притвор, додека полицијата работи на пронаоѓање на останатите осомничени.
За делото „Трговија со луѓе“, според Кривичниот законик, запретена е казна затвор од најмалку четири години, додека за клиентите кои користеле сексуални услуги е предвидена казна од шест месеци до пет години.
Овој случај повторно ја отвори темата за борбата против семејното насилство и трговијата со луѓе во Македонија. Организациите за заштита на жртвите бараат поригорозни казни и подобри механизми за заштита на жените кои се изложени на насилство и експлоатација.
