Инцидент во парк во Ѓорче Петров
Во текот на вчерашниот ден, во паркот во Ѓорче Петров падна исушено дрво на само два метра од клупа на која седеле возрасни лица, додека наоколу си играле деца. За среќа, никој не е сериозно повреден.
Граѓаните предупредувале, институциите молчеле
Сведоци на настанот споделија информации во фејсбук-групата „Мое Ѓорче“, каде посочија дека веќе подолго време се алармирало до Град Скопје за состојбата на исушеното дрво, но без реакција. Жителите велат дека инцидентот можел да прерасне во трагедија.
Сведоштво на преживеан
Гоце Настоски, кој седел на клупата кога паднало дрвото, раскажа дека само благодарение на едно друго дрво падот бил пренасочен. Дел од гранките го погодиле во главата.
„Еден од работниците од општината ми рече да си го прославам денот како втор роденден,“ изјави Настоски, кој објави и фотографии од инцидентот на социјалните мрежи.
Страв и гнев кај родителите
Друг жител раскажа дека неговите две деца играле блиску до местото на паѓање. Тој повтори дека граѓаните се јавиле повеќекратно кај надлежните, но без успех.
„Зарем да гинеме по парковите?“ – прашува тој, револтиран од негрижата на јавните служби.
