Скопјанец пријавил во полиција дека бил жртва на измама вредна дури 23.000 евра. Според информациите од Министерството за внатрешни работи, настанот бил пријавен на 23 април 2025 година во 19:30 часот во СВР Скопје од страна на 65-годишен маж од скопско.
Како што информира полицијата, во периодот од мај до септември 2024 година, оштетениот во неколку наврати му предал вкупна сума од 23.000 евра на лице кое го познавал. Имено, пријавениот Ф.Н. наводно му ветил дека ќе помогне во обезбедување на вработување за внукот на скопјанецот, но договореното не било исполнето.
По неколку месеци чекање и без никакви резултати, оштетениот сфатил дека станува збор за измама и решил случајот да го пријави во полиција. Од страна на надлежните органи се преземаат мерки за целосно расчистување на случајот и лоцирање на сторителот.
Министерството за внатрешни работи апелира до граѓаните да бидат внимателни при вакви лични договори и да не даваат пари без правна сигурност, особено кога станува збор за ветувања поврзани со вработување.
