Првомајските празници, покрај славењето и одморот, донесоа и сериозни сообраќајни прекршоци на патиштата низ државата. Според информациите од Министерството за внатрешни работи, за само еден ден – 1 мај 2025 година, биле издадени 613 платни налози, од кои значителен број се однесуваат на опасни и неодговорни прекршоци.
Алкохолот повторно главна причина за прекршоци
Од вкупниот број казни, 132 се однесуваат на возачи кои управувале под дејство на алкохол. Оваа бројка ја потврдува алармантната појава на пијани возачи во сообраќајот, особено за време на празници, кога се зголемува и бројот на собраќајни несреќи.
Возење без дозвола – постојан проблем
Освен алкохолизираните возачи, МВР регистрираше 114 лица кои управувале возило без положен возачки испит. Со тоа, не само што го прекршуваат законот, туку и директно го загрозуваат животот и безбедноста на сите учесници во сообраќајот.
Казни и за брзо возење и нерегистрирани возила
Дополнително, 115 возачи биле санкционирани за пречекорување на дозволената брзина, а 24 возила биле отстранети од сообраќај поради нерегистрираност, како и 4 технички неисправни возила.
МВР апелира до граѓаните да се однесуваат одговорно во сообраќајот, особено во празнични денови кога фреквенцијата на патиштата е зголемена. Безбедноста на сите учесници зависи од поединечната совесност и почитувањето на правилата.
