Судот донесе одлука да определи 30-дневен притвор за бизнисменот Ратко Капушевски, сопственик на фирмата РКМ, поранешниот директор на ЕСМ, Адријан Муча, и Ерџан Сулкоски во рамки на истрагата за спорниот тендер за набавка на мазут за ТЕЦ Неготино.
Од Кривичниот суд вечерва соопштија дека кај овие лица постои опасност од бегство, како и сериозни индиции дека би можеле да ја попречат истрагата преку влијание врз сведоците, што биле главните причини за одредувањето притвор.
Во меѓувреме, судот донесе одлука за куќен притвор за сопственикот на „Пуцко Петрол“, Асмир Јахоски. Јавниот обвинител, по произнесувањето на Јахоски пред судијата на претходна постапка, се согласи со промена на првично предложената мерка притвор во куќен притвор, што беше прифатено од судот.
За останатите седум осомничени кои беа спроведени во судот, судијата прифати да бидат изречени мерки за претпазливост наместо притвор.
Триесетдневен притвор, куќен притвор и меѓународна потерница
Против судските решенија, странките имаат право на жалба пред Кривичниот совет.
Обвинителството за гонење на организиран криминал и корупција претходно донесе наредба за истрага против тринаесет лица и една фирма, поради сомневања за злоупотреба на тендер за набавка на мазут за потребите на ТЕЦ Неготино.
Во рамки на полициската акција, која под раководство на јавен обвинител се изведуваше на повеќе локации во Скопје, Велес и Кичево, беа уапсени 11 лица.
Покрај приведените, со истрагата е опфатен и поранешниот директор на ЕСМ, Васко Ковачевски, кој во моментов е во бегство. За него е распишана меѓународна потерница во врска со случајот „Адитив“.
Овој случај предизвика голем интерес во јавноста, особено поради сомнежите за злоупотреба на огромни суми јавни средства и начинот на кој биле доделувани тендерите за набавка на мазут.
