Основното јавно обвинителство Скопје покрена истрага против едно лице осомничено за бесправно градење на шесткатна зграда со деловни простории на улицата „Кемал Сејфула“ во скопската општина Чаир – објект кој се градел без дозвола и на државно земјиште.
Дивоградба од шест ката без дозвола
Објектот, според ОЈО, почнал да се гради во 2024 година, а осомничениот, кој бил управител на правно лице, се јавувал како инвеститор на градбата – станбена зграда со катност По+П+6+Пк, наменета за продажба.
Судски вештак утврдил дека објектот веќе е во напредна фаза – целосно избетонирана армирано-бетонска конструкција до шести кат, со започнато ѕидање на надворешни и внатрешни ѕидови.
Мерки на претпазливост против инвеститорот
Јавниот обвинител предложи мерки на претпазливост до судија на претходна постапка, меѓу кои:
- обврска за редовно јавување кај службено лице,
- привремено одземање на патната исправа,
- забрана за продолжување на градежните работи на објектот.
Истрагата е покрената по пријава од група граѓани, а станува збор за дело според член 244-а од Кривичниот законик – Бесправно градење.
