Денеска, 568 пензионери со ниски примања од Општина Гази Баба добија по 2.500 денари директна финансиска помош на своите банкарски сметки. Исплатата е дел од јавниот повик објавен од Општината, на кој се пријавиле вкупно 2.700 пензионери.
Од локалната самоуправа информираат дека ова е втора исплата во рамки на иницијативата. Претходно, 510 пензионери веќе добија парична поддршка, со што досега вкупно 1.078 лица се опфатени со програмата.
– Комисијата продолжува со работа и во следните денови ќе има нова исплата за наредната група пензионери. Помошта ќе продолжи сè до исплаќањето на сите 2.700 пријавени пензионери – велат од Општина Гази Баба.
Локалната власт нагласува дека ова не е првпат да се преземаат вакви чекори за поддршка на социјално ранливите категории. Во време на енергетската криза, беше доделена и финансиска помош за покривање дел од трошоците за електрична енергија.
Општината најавува дека и понатаму ќе работи на креирање мерки што ќе им помогнат на граѓаните со најниски примања, особено на постарите лица.
