Јавното обвинителство бара притвор за директорот на ЈЗУ Геријатриска установа Мухсин Арифи и уште едно лице, осомничени за примање поткуп за болничко сместување. Истражната постапка открива дека Арифи, во повеќе наврати од 19 март до 8 април 2025 година, директно барал пари за да обезбеди кревет за пациент кој итно требало да биде згрижен по препорака на лекар.
Состојбата на пациентот критична, но бил на листа на чекање
Иако здравствената состојба на пациентот се влошувала, тој бил ставен на листа на чекање. Второосомничениот посредувал и закажал средба со директорот на 19 март во еден локал во Скопје. Тогаш, бил побаран износ од 100.000 евра како „гаранција“ за прием во установата.
Предлог: Продадете стан за да добиете кревет
Сведокот, жена блиска на пациентот, реагирала дека сумата е преголема. Директорот тогаш предложил да се дојде до парите преку продажба на недвижнина – стан што го поседувал пациентот. Тоа не било прифатливо, но следувале уште две средби.
Договорот: 20.000 евра за прием
Конечно било договорено сведокот да исплати 20.000 евра. Вчера, директорот Мухсин Арифи бил фатен во моментот кога ја примал сумата, при организирана полициска акција.
Обвинителството бара притвор
Јавното обвинителство го предлага притворот како мерка за да се обезбеди непречено водење на постапката и да не се влијае врз сведоци или истрагата. Случајот отвори сериозни прашања за злоупотреба на службена положба во јавното здравство, особено кога станува збор за згрижување на пациенти во тешка здравствена состојба.
