МНР: Македонските државјани во Израел сè уште не се евакуирани – се чека завршување на процедури
Македонските државјани кои се наоѓаат во Израел сè уште не се евакуирани бидејќи административните процедури за нивно заминување не се завршени, информира Министерството за надворешни работи (МНР) за ТВ 24.
Владиниот авион сè уште не тргнал кон Израел
Според МНР, владиниот авион не е испратен сè додека не се завршат сите неопходни формалности. По завршувањето на постапките, државјаните ќе бидат транспортирани преку трети земји.
Дипломатскиот тим во Тел Авив во контакт со граѓаните
Дипломатско-конзуларното претставништво во Тел Авив е во постојана комуникација со 22 македонски државјани кои побарале асистенција. Бројката останува иста, без нови пријави. Досега, не е побарана помош од македонски граѓани во Иран.
Мицкоски: Евакуацијата може да започне денес или утре
Премиерот Христијан Мицкоски информираше дека евакуацијата на девет лица се очекува денеска или утре, преку Египет. Тој увери дека сите македонски државјани кои се во очекување на евакуација се во добра состојба.
Апел за воздржаност од патувања во Израел и Иран
МНР ги повикува граѓаните да се воздржат од патувања во Израел и Иран. Воздушниот простор над овие две земји и понатаму останува затворен.
