Двегодишната Данка Илиќ исчезна на 26 март 2024 година во населбата Бањско Поље кај Бор, Србија. Последен пат била видена со мајка ѝ и братчето пред семејната куќа. Само неколку минути подоцна, исчезнала без трага. Мајката алармирала полиција и започна масовна потрага каква што Србија не видела до тогаш.
Потрагата што го тресеше Балканот
Десет дена целата земја беше во неизвесност. Полицијата, спасувачите, хеликоптери и дронови го пребаруваа регионот. Активиран беше и системот „Најди ме“. Се прегледуваа бунари, канали, шахти и напуштени објекти. Дури и во Виена беше регистрирана девојка која личела на Данка – но беше лажна тревога.
Признание, убиство… и уште поголема мистерија
По 10 дена беше објавено дека Данка е убиена. Уапсени беа двајца мажи – Дејан Драгијевиќ и Срѓан Јанковиќ – кои признале дека случајно ја удриле со автомобил, ја ставиле во багажник и потоа ја фрлиле на депонија. Но набргу потоа, признанијата беа повлечени. Телото на Данка не беше пронајдено.
Семејни врски и сомнежи
Подоцна во истрагата, беше приведен и братот на Драгијевиќ – Далибор – кој во полиција признал дека му помогнал да го скрие телото. Тој ненадејно почина во притвор пред да биде сослушан. Приведен беше и нивниот татко, кој молчеше пред истражителите.
Обвиненија без крај
Првото обвинение беше подигнато во септември 2024 година, а потврдено во февруари 2025 година. Обвинетите го менувале исказот повеќепати. Сѐ уште не е познато кога ќе започне судењето, ниту пак дали има нови докази во случајот.
Големото прашање останува
И една година подоцна, главното прашање и натаму нема одговор: каде е телото на малата Данка Илиќ? Обвинителството молчи, семејството чека, а јавноста сѐ уште се надева дека ќе се дознае вистината за една од најшокантните трагедии во поновата историја на Србија.
