Најдобриот тенисер на сите времиња, Новак Ѓоковиќ, покрај својот импресивен настап на Австралија Опен, најде време да ја истакне играта на младиот бразилски тениски талент Жоао Фонсека. Ѓоковиќ, кој се пласираше во третото коло на турнирот, воодушевено зборуваше за перспективниот 18-годишен играч.
Победа и пофалби
Ѓоковиќ во втората рунда на Австралија Опен го совлада квалификантот Жаиме Фарија со 3:1 во сетови. По три часа интензивна борба, српскиот ас славеше победа и потоа одвои време да го пофали Жоао Фонсека, кој претходно успеа да го елиминира високорангираниот Андреј Рубљов.
„Му честитав на Фонсека пред само неколку минути. Тој не само што победи против Рубљов, туку покажува голем напредок последните шест месеци или една година. Ја следам неговата игра и навистина сум негов фан,“ изјави Новак на прес-конференцијата.
„Гледам дел од својата игра“
Ѓоковиќ објасни дека играта на Фонсека потсетува на неговите млади денови. „Ми се допаѓа како удира чисто, како игра со храброст и без никакво стеснување. Во секој поен покажува што има. Во него гледам дел од мојата игра кога бев на негови години,“ рече Новак.
Новата надеж на Бразилскиот тенис
Фонсека, кој се издвои како нова ѕвезда на светскиот тенис, потекнува од земја која долго време не изнедрила играч од светски калибар. Последната голема бразилска тениска ѕвезда беше славниот Густаво Куертен.
„Добро е за тенисот да имаме играч од земја како Бразил. Таква млада личност, со толкава храброст, навистина ветува многу. Ако продолжи вака, иднината му е светла,“ додаде Ѓоковиќ.
Поглед кон иднината
Со вакви зборови од светски тениски гигант како Ѓоковиќ, Фонсека несомнено ќе добие дополнителна мотивација за својот напредок. Бразилскиот тенис сега има нова надеж, а светот ќе продолжи да го следи подемот на овој млад играч.
