Задолженоста на граѓаните кај банките продолжува да расте, покажуваат најновите податоци на Народната банка. Во месец април 2025 година, вкупниот долг на населението достигнал 4,168 милијарди евра. Кога ќе се додадат и долговите на компаниите, вкупниот износ се искачува на 8,268 милијарди евра.
Најмногу се задолжуваме за потрошувачки и станбени кредити
Според извештајот, граѓаните најчесто се задолжуваат преку потрошувачки и станбени кредити. Потрошувачките кредити бележат месечен раст од 0,9%, додека станбените пораснале за 1,1%. На годишно ниво, растот е уште поизразен – 9,1% кај потрошувачките и дури 14,0% кај станбените кредити.
Автомобилски и кредитни картички – послаб раст или пад
Автомобилските кредити растеле за 0,4% на месечно ниво, а 2,3% на годишно. Кредитните картички бележат месечен раст од 0,3%, но пад од 7,9% во споредба со истиот период минатата година.
Остатокот од задолжувањето
- Негативни салда на тековни сметки: месечен пад од 9,3%, годишен раст од 0,1%
- Кредити по други основи: месечен и годишен пад од 2,3% и 9,0%, соодветно
Депозити поголеми од долговите, но трендот е јасен
Иако вкупните депозити изнесуваат 9,771 милијарди евра, што е повеќе од вкупниот долг, сепак податоците покажуваат константен раст на задолженоста, особено кај физичките лица. Од вкупните депозити, 6,644 милијарди евра се на сметка на граѓаните.
