Истрагата за трагичниот пожар во импровизираната дискотека во Кочани, во кој загинаа млади животи, според родителите на настраданите, се одвива премногу бавно и без конкретни резултати. Тие продолжуваат да бараат одговорност од сите инволвирани, особено поради тоа што објектот со години работел без никакви стандарди и законски дозволи.
Тошковски: Се надевам дека наскоро ќе заврши
Министерот за внатрешни работи, Панче Тошковски, во телевизиско гостување истакна дека очекува истрагата наскоро да биде завршена, нагласувајќи дека истата открива длабоки коруптивни проблеми во институциите што требало да го спречат ваквиот исход.
„Се надевам дека за брзо ќе заврши истрагата и ќе покаже дека е последица на еден корумпиран систем, кој со години го нагризувал легитимитетот и легалитетот на работењето на објектот,“ изјави Тошковски.
Според него, доказите до кои досега се дошло упатуваат на континуирани институционални пропусти, кои овозможиле да се случи трагедија од ваков обем.
Течна постапка, 13 обвинители на случајот
Од истражните органи информираат дека на случајот активно работи тим од 13 обвинители, и дека не се исклучува можноста истрагата да се прошири со нови лица. Сè уште нема потврда за точниот број лица во притвор или под други мерки, но се напоменува дека по секој поединечен предмет се постапува одделно.
Главниот обвинител Лупчо Коцевски најави дека истрагата треба да заврши до 17 јуни.
Кочани во тишина и болка
Додека институциите работат на завршување на истрагата, Кочани остана тивок и потресен град. Болката, шокот и чувството на беспомошност се сè уште длабоко присутни во многу семејства. Психолози предупредуваат дека за многумина траумата сè уште не е обработена и затоа е важно да се пружи психолошка помош.
Во таа насока, Црвениот Крст во соработка со Комората на психолози веќе има формирано група од локални психолози, која ќе прерасне во Регионален центар за ментално здравје, со цел да понуди поддршка на сите погодени од трагедијата.
