Претседателот на Република Српска, Милорад Додик, изјави дека ќе присуствува на воената парада во Москва на 9 мај, и покрај предупредувањата од Европската Унија дека таквиот чекор би можел да резултира со санкции. Оваа негова изјава стана утринска насловна на руската државна новинска агенција ТАСС.
„Сакам да бидам таму во тоа време и ќе одам“, изјави Додик за Радио и телевизија на Република Српска, додавајќи дека му е чест што ја добил поканата од рускиот претседател Владимир Путин.
Чест и антифашистичко наследство
Додик нагласи дека не се плаши од евентуални санкции бидејќи посетата претставува среќавање со „еден од најважните светски лидери“. Тој ја истакна и важноста на обележувањето на 80-годишнината од победата над фашизмот, велејќи дека зачувувањето на антифашистичката традиција е клучна за иднината на Европа.
ТАСС ја пренесе неговата изјава со фокус на неговата подготвеност да пркоси на ЕУ и да ја зачува соработката со Москва.
Европската Унија со спротивен став
Шефицата на европската дипломатија Каја Калас повика претставниците на земјите кандидати за членство во ЕУ да не присуствуваат на парадата во Москва, туку да заминат во Киев како знак на поддршка. Таа потсети дека за земјите-кандидати важи обврската да ја усогласуваат својата надворешна политика со онаа на ЕУ.
Босна и Херцеговина, каде што Додик е еден од членовите на претседателството, доби кандидатски статус за членство во ЕУ во 2022 година.
