Осум дена по разорниот земјотрес со јачина од 7,7 степени што ја погоди Мјанмар, бројот на загинати надмина 3.300 луѓе, а повеќе од 220 се водат како исчезнати. Над 4.850 лица се повредени, додека илјадници се без засолниште, вода и храна.
Меѓународните организации алармираат на можна епидемија на колера и други заразни болести, особено поради недостаток на здравствени ресурси во погодените региони.
Обвинувања за селективна помош
Обединетите нации ја обвинија воената хунта во Мјанмар за селективна дистрибуција на хуманитарна помош – насочена само кон поддржувачите на режимот. Заедниците кои не го поддржуваат воениот режим се оставени без храна, вода и медицинска помош, велат од Високиот комесаријат за човекови права на ОН.
Армијата не ги коментираше обвинувањата.
Земја во хаос
Мјанмар веќе се соочуваше со тешка хуманитарна и политичка криза откако во 2021 година војската ја собори демократски избраната влада. Од почетокот на граѓанската војна, над три милиони луѓе се раселени, а повеќе од една третина од населението зависи од хуманитарна помош.
Катастрофалниот земјотрес од 28 март само ја продлабочи кризата: многу болници се урнати, а цели села се уништени.
Прекинот на огнот – само на хартија
Иако хунтата најави привремен прекин на огнот, според ОН тој не се почитува. Само од средата, војската спровела најмалку 16 воздушни напади, вклучително и врз области погодени од земјотресот. Овие напади ги доведуваат во опасност обидите за доставување помош и евакуација на преживеаните.
Хунтата продолжува со политички притисок и воено присуство, а меѓународната заедница сè повеќе бара одговорност и поголем притисок врз властите во Најпјидо.
