Агенцијата на Обединетите нации за помош на палестинските бегалци (УНРВА) денеска издаде алармантно предупредување – резервите на брашно во Појасот Газа се доволни само за уште шест дена, поради целосната блокада на хуманитарната помош.
Сериозна хуманитарна криза
„Можеме да го продолжиме со снабдувањето ако ја намалиме количината на брашно која им ја даваме на луѓето, но зборуваме за денови, не недели“, изјави Сем Роуз, претставник на УНРВА, преку видео врска од централна Газа.
Според него, ситуацијата е „сериозно загрижувачка“, особено што шест од 25 пекари поддржани од Светската програма за храна (WFP) веќе престанале со работа, оставајќи илјадници луѓе без пристап до леб.
Најлошиот период од почетокот на конфликтот
Организациите на ОН предупредуваат дека ова е најдолгиот период без влез на хуманитарна помош во Газа откако почна конфликтот во октомври 2023 година. Израел ја блокира испораката на стоки поради неуспехот да се постигне прекин на огнот со Хамас, што дополнително ја влоши состојбата.
Ефектите се веќе видливи
Блокадата предизвика драстично зголемување на цените на основните прехранбени производи и гориво, а се повеќе семејства се приморани да го ограничат дневниот внес на храна. Граѓани се собираат пред затворените пекари, надевајќи се дека ќе добијат барем едно лепче.
