Макрон: Европа треба да стане понезависна од САД
Францускиот претседател, Емануел Макрон, истакна дека Европската Унија мора да вложи повеќе напори за својата одбранбена индустрија и да биде понезависна од САД во однос на набавките и колективната безбедност. На состанокот во Брисел, тој изрази загриженост за можните последици од новите политики на администрацијата на Доналд Трамп и ги повика европските лидери да бидат пообединети.
„Многу е едноставно. Треба да бидеме повеќе наклонети кон домашните набавки,“ изјави Макрон, објаснувајќи дека Европа треба да го зајакне своето производство и финансиска независност за да биде поотпорна на надворешни предизвици. Тој ги повика земјите-членки на ЕУ да приоретизираат европски производи и инвестиции.
Повеќе инвестиции во одбранбената индустрија
Макрон истакна дека ЕУ треба да инвестира повеќе во својата одбранбена индустрија, што ќе ја направи помалку зависна од странски добавувачи. „Ова подразбира и поголемо европско финансирање и исклучување на воените трошоци од буџетските правила,“ рече тој, додавајќи дека ова ќе ѝ овозможи на Унијата да биде посамостојна во обезбедувањето колективна безбедност.
Европа подготвена да реагира на трговски напади
Макрон нагласи дека Европа мора да биде подготвена да одговори на секој напад врз нејзината меѓународна трговија. Тој се осврна на најавите за нови царини од страна на Трамп, велејќи дека ЕУ треба да преземе одлучни чекори за да ги заштити своите интереси.
„Доколку бидеме нападнати во однос на трговијата, Европа, како сила која се држи, ќе треба да стори сѐ за да биде почитувана,“ изјави францускиот претседател.
Макрон смета дека изјавите на Трамп би можеле да имаат позитивен ефект врз ЕУ, поттикнувајќи поголема кохезија и солидарност меѓу европските земји.
