Украинскиот претседател Володимир Зеленски остро го нападна унгарскиот премиер Виктор Орбан поради неговите обиди да посредува меѓу Украина и Русија. Зеленски изјави дека Орбан нема капацитет да изврши притисок врз рускиот претседател Владимир Путин, нагласувајќи ја важноста на директните односи меѓу Украина и нејзините сојузници, особено САД.
Зеленски ја одби посредничката улога на Орбан
Во својата изјава, Зеленски отворено го доведе во прашање авторитетот и способноста на Орбан да влијае врз Путин. Украинскиот претседател нагласи дека Украина е силна земја со неприкосновено искуство стекнато во борбата против руската агресија.
„Кој друг во Европа има такво искуство? Никој. Орбан нема војска како нашата. Како мисли да изврши притисок врз Путин? Со шега или насмевка? Може да го задржи тоа за себе,“ рече Зеленски, демонстрирајќи целосно отфрлање на улогата на Орбан како посредник.
Зеленски: Мировните напори бараат сериозност
Украинскиот претседател беше дециден дека обидите на Орбан за посредување се несериозни и несоодветни за тежината на ситуацијата. Зеленски додаде дека Украина е таа која најмногу страда во овој конфликт и дека мировните преговори треба да бидат иницирани од страна на агресорот, односно Русија, а не од Украина.
„Премиерот Орбан, кој сака да постигне мир во Украина… знаете, ‘некако, некаде…’ нема да успее. Нема да дозволам тој или таквите луѓе да се занимаваат со тоа,“ изјави Зеленски.
Директни односи со САД се клучни
Зеленски ја нагласи потребата од директни односи со САД и нивната поддршка, без посредници. Тој посочи дека Украина, како жртва на агресија, има целосно право да бара директна комуникација со своите сојузници.
„На Украина и треба помош за да победи, не празни ветувања. Посредувањето на Орбан е само губење време,“ додаде Зеленски, јасно демонстрирајќи дека Украина ќе ја преземе иницијативата во разговорите за мир.
Односите меѓу Киев и Будимпешта остануваат тензични
Иако Зеленски го критикуваше Орбан, тој нагласи дека неговите зборови се насочени кон унгарскиот премиер и не се однесуваат на унгарскиот народ, кој, според него, ја поддржува Украина.
„Имам почит кон унгарскиот народ, но нема да дозволам политички манипулации кои ја ослабуваат нашата позиција,“ рече тој.
